QUERO SER PRESIDENTE

Para abrir esta nova sección de reseñas no meu blog, nada mellor que este libro de comunicación política. Non só porque é do meu titor da tese, senón porque é un libro diferente. Collín o libro con curiosidade, disposta a botarlle unha ollada por encima e parándome a ler unicamente os capítulos mais interesantes, pero cando comecei non puiden deixar de ler.

Directo e con moito humor e ironía, Rúas debulla o panorama político e o traballo do asesor de comunicación dunha forma moi amena e mordaz. Consegue ser un bo manual das claves da comunicación política (que é o que se pretende) pero cunha gran sinceridade e chamando ás cousas polo que son. Aínda que sen caer no sensacionalismo e sen danar a imaxe pública de ninguén.

Se os políticos aspirantes a alcaldes, conselleiros, concelleiros, deputados, senadores, e por suposto presidentes, se atopan con este libro, daranse conta da importancia da comunicación e da estratexia para unha campaña política de éxito.

Comparto co autor a visión da campaña electoral como un xogo de rol e estratexia, na que o dispor dun bo asesor de comunicación é fundamental. Por eso me atrevo a pronogsticar que se os lectores do libro son políticos, gracias a Rúas, nos vindeiros anos van a aumentar o número de asesores de comunicación que contraten as súas organizacións. (Esto tamén é un perigo, xa que a competencia poderá volverse cada vez máis perigosa).

Rúas Araújo, X. (2008), Quero ser presidente. Claves de comunicación política, Santiago de Compostela, Alvarellos Editora.

Pódese mercar na web da editorial

Se cando era pequena lía as aventuras de Flanagan e quería ser detective, agora que lin este libro... (non, non quero ser presidenta), quero traballar en comunicación política.